საქართველოს ცენტრალური საარჩევნო კომისიის, საარჩევნო სისტემების საერთაშორისო ფონდისა (IFES) და საარჩევნო სისტემების განვითარების, რეფორმებისა და სწავლების ცენტრის თანამშრომლობით, განხორციელდა საპილოტე პროექტი, რომლის ფარგლებში მიმდინარე წლის 14 – 21 დეკემბერს საქართველოს საარჩევნო ადმინისტრაციას წმინდა ლუისის სახელობის უნივერსიტეტის ექსპერტი დებატების დარგში - დიანა კარლინი ეწვია. პირველ ეტაპზე მან ცესკოსა და ცენტრის ტრენერებისათვის ჩაატარა ტრენინგი თემაზე - დებატების კულტურა, ხოლო მეორე ეტაპზე, კავკასიის უნივერსიტეტის, სოხუმის   უნივერსიტეტისა და გურამ თავართქილაძის სახელობის უნივერსიტეტის სტუდენტებისათვის, მოაწყო საჯარო ლექცია დებატების თემაზე, მან სტუდენტებს გააცნო ის ძირითადი ასპექტები რაც მნიშვნელოვანია დებატებში მონაწილების მისაღებად, უპასუხა მათთვის საინტერესო კითხვებს და გაუზიარა მათ საკუთარი გამოცდილება.

პროექტის განხორციელების მესამე ეტაპზე, 21 დეკემბერს, ცენტრის ტრენერების დახმარებით და ზემოაღნიშნული უნივერსიტეტების სტუდენტების მონაწილეობით, საქართველოს ცენტრალური საარჩევნო კომისიის საკონფერენციო დარბაზში მოეწყო სტუდენტური დებატ - კლუბი თემაზე: ”არჩევნებში მონაწილეობა - უფლება, თუ მოვალეობა”. დებატებში ორმა გუნდმა მიიღო მონაწილეობა და იგი შედგებოდა სამი რაუნდისგან: პრეზენტაცია, პაექრობა და ინტერაქტიური შეჯიბრი. სტუდენტებმა წარმოადგინეს მყარი არგუმენტები საკუთარი პოზიციების დასაცავად, გამართეს რეალური პაექრობა და უპასუხეს დარბაზის მიერ დასმულ კითხვებს. ღონისძიების დასასრულს მონაწილეებს გადაეცათ სერთიფიკატები.

ღონისძიებას დაესწრნენ საარჩევნო სისტემების საერთაშორისო ფონდის (IFES), ცესკოსა და ცენტრის წარმომადგენლები.