საქართველოს პარლამენტის შუალედური არჩევნების მეორე ტურისთვის სწავლების ცენტრის მიერ შემუშავებული ტრენინგების კონცეფციის შესაბამისად, 2019 წლის 3-5 ივნისს განხორციელდება საუბნო საარჩევნო კომისიების წევრთა I ეტაპის ტრენინგები, რომელიც დაეთმობა საუბნო საარჩევნო კომისიების ხელმძღვანელ პირთა სწავლებას.

პროფილური სასწავლო პროგრამის ფარგლებში ყურადღება გამახვილდება საუბნო საარჩევნო კომისიის ხელმძღვანელი პირების უფლებამოსილებებზე (საორგანიზაციო, საზედამხედველო და რეაგირებითი) კენჭისყრის დღეს საარჩევნო ოპერაციების მართვის პროცესში, მათ შორის განხილულ იქნება:

• საარჩევნო უბნის გახსნა და კენჭისყრის პროცესის დაწყებამდე ჩასატარებელი პროცედურები;
• კენჭისყრის პროცესში პროცედურული რისკების იდენტიფიცირება და რეაგირება;
• ამომრჩეველთა პერსონალური მონაცემების დაცვა;
• კენჭისყრის შედეგების შეჯამება საუბნო საარჩევნო კომისიაში და კენჭისყრის შემაჯამებელი ოქმის შევსების ინსტრუქცია;
• საარჩევნო დოკუმენტაციის დალუქვის წესი;
• საარჩევნო უბანში ფოტო-ვიდეოგადაღების რეგულაციები და არჩევნების უსაფრთხოების საკითხები;
• კენჭისყრის დღის განცხადება/საჩივრები;
• კენჭისყრის დღის ჩანაწერთა წიგნის წარმოება.

საუბნო საარჩევნო კომისიების ხელმძღვანელ პირთა პროცედურული ცოდნის ამაღლების ხელშეწყობის მიზნით, ტრენინგი ჩატარდება კომბინირებული მეთოდოლოგიის გამოყენებით.

ტრენინგების ჩატარებას სწავლების ცენტრის წარმომადგენლები უზრუნველყოფენ. I ეტაპის ტრენინგების გრაფიკები იხილეთ ბმულზე. გრაფიკში ცვლილებების განხორციელების შემთხვევაში, ინფორმაცია აისახება დაუყოვნებლივ.