მიმდინარე წლის 20-24 მაისის პერიოდში, სწავლების ცენტრმა პარტნიორ უნივერსიტეტებში ჩაატარა სემინარები თემაზე „ინფორმირებული ახალგაზრდა ამომრჩეველი“. შეხვედრების ფარგლებში სხვადასხვა ფაკულტეტის სტუდენტები გაეცნენ საერთაშორისო ტენდენციებს არჩევნებში ტექნოლოგიების გამოყენების მიმართულებით, განიხილეს საქართველოს საარჩევნო ადმინისტრაციის მიერ ამომრჩევლებისთვის შეთავაზებული სერვისები და ელექტრონული აპარატებით კენჭისყრის ჩატარების სიახლეები.

საინფორმაციო შეხვედრები თბილისსა და რეგიონებში მოქმედ 9 უმაღლეს საგანმანათლებლო დაწესებულებაში გაიმართა. მასში მონაწილეობა ივანე ჯავახიშვილის სახელობის თბილისის სახელმწიფო უნივერსიტეტის, ილიას სახელმწიფო უნივერსიტეტის, აღმოსავლეთ ევროპის უნივერსიტეტის, კავკასიის საერთაშორისო უნივერსიტეტის,  გრიგოლ რობაქიძის სახელობის უნივერსიტეტის (თბილისისა და ბათუმის წარმომადგენლობა), გორის სახელმწიფო უნივერსიტეტის, სამცხე-ჯავახეთის სახელმწიფო უნივერსიტეტის, იაკობ გოგებაშვილის სახელობის თელავის სახელმწიფო უნივერსიტეტის, ბათუმის შოთა რუსთაველის სახელმწიფო უნივერსიტეტის 200-მა სტუდენტმა მიიღო (ქალი - 130, კაცი - 70).

სწავლების ცენტრმა ელექტრონული აპარატების  გამოყენებით იმიტირებული კენჭისყრა ჩაატარა. ახალგაზრდებმა მოდელირებულ არჩევნებში მონაწილეობით პრაქტიკული გამოცდილება მიიღეს.

მიმდინარე აქტიური საინფორმაციო კამპანია ორიენტირებულია საარჩევნო პროცესში დანერგილი სიახლეების პოპულარიზაციაზე და ახალგაზრდების აქტიურ, ინფორმირებულ ამომრჩევლებად ჩამოყალიბების ხელშეწყობაზე.